aḍris agi d mass Ferhat Baluli i t-yuran yefɣ-d deg uɣmis n la dépèche de kabylie assen n 13/03/2011

“Akal d wawal”

Gar tmacahut d tullist

“Akal d wawal” d adlis i d-yessufeɣ mass Arezqi Djamal deg useggas n 2009 ɣer tezrigin “Tira”, amyaru-agi am akken musnaw d aselmad n tmaziɣt di tseddawit n tubiret, illul deg useggas 1966 di Tezmalt/Bgayet, yella yakkan d amaswaḍ n tutlayt tafransist akk d tamaziɣt di tubiret, si tama n usizreg adlis-agi i d ahil amenzu id-yesufeɣ, maca, mazal assirem ɣer zdat; imi netta yenna d akken yesεa idlisen nniḍen yettrağun asizreg. Deg ugbur n udlis-agi ad naf llant mraw d yiwet (11) n tulisin, yebda-tt s tin iwumi yega aẓewel “D acu i ixeddem Rebbi” sin ḍefrent-ed tiyaḍ ta deffir ta; “D ddker neɣ d llenta ?”, “Irgazen kkaten uzzal”, “Taqsiṭ n ugellid d wakli”, “Tadyant n Ccix”, “Aqelmun ɣer yiḍarren”, “Teẓram neɣ ur teẓrim ara?”, “Winna imecḥen aḍaḍ-is”, “Bu snat n tlawin” “D acu i txeddem temẓi” sin yesegra-d s yiwen weḍris yerra-t d tijemilt i yaya-s tamedyazt. Myal yiwet di tulisin n wamud-agi ɣef acu d-tewwi ameslay, isental mgaraden si yiwet ɣer tayeḍ, ulac kra iten-yesduklen ala anziz n tutlayt(awal) d wakal i deg ḍrant, meslayent-ed ɣef trugza, yir jwaj, sεaya, lεeza, tusḍa d wayen nniḍen. “Akal d wawal” di tidet d yiwet n tira yellan di tlemast n webrid ger tmacahutt akk d tulist; ur telli d ta, ur telli d tihin, deg udlis-a yesdukkel urezqi Djamal ger weqbur d umaynut, deg-s yules-aɣ-ed timucuha s uɣanib amaynut, maca, nezmer ad d-nestaqsi: amek d-yeḍra waya? Amedya, di tulist tamenzut ”d acu i ixeddem Rebbi” taqsiṭ d tin n yiwen umaɣbun iwumi qqaren Ɛmer Aḥwayli, iḥḍer-as-ed ad yawi tarzeft i lqayed id-iḥuğen ussan-nni, dɣa mi is-tt-yewwi yaff-en din lḥeğağ n taddert win-d myal d llxir d wayen iwumi ur yezmir Ɛmer Aḥwayli, εedda yeqqim di ṭerf, yesetḥa; imi netta ur d-yewwi ala taɣaṭ-nni n lḥif… ihi seg ukufer-nni, yenṭaq ɣer lḥeğağ-nni yenna-asen: d acu i ixeddem Rebbi ass-a? yal yiwen amek is-d-yerra, keč tjahleḍ, ur tettsetḥiḍ ara… maca netta yezzi yenna-asen: ẓriɣ d acu i ixeddem, sin staqsant-id: d acu? yinni-yasen: ixellu ixxamen-nnwen iεemar wid n lqayed!! din mfaraqen irkkel.
Ger tamawt deg tulist-a, am tulisin akk nniḍen n udlis-a, ad naf taqsiṭ tettban kan akka tettwasqucḍ-ed si tsekla taɣerfant, dɣa tuget n tulisin ḍrant di zman aqbur maca tameslayt swayes ttwarunt d tin n tura, ula d allallen n tira d wid n wass-a, dɣa netta yakkan iwelh-ed di tazwara n udlis d akken ad yefk azal i weglim, win yeṭṭfen s tidet amur ameqran deg tulisin n udlis-agi. Am akken nger tamawt daɣen d akken myal tulist tkefu s yizen, izen-nni dɣa id-yesebganen s wudem unṣib d akken tulist tettwazedmed seg idles aɣerfan.
Гer tagara yettban-iyi-d d akken udem-agi n tira deg-s aṭas n wayen yelhan, ama i yemyura aceku ileddi-d abrid akken ad nḥiwec akk tasekla-nneɣ taɣerfant, am akken yelha i yimeɣriyen aceku deg-s aṭas n zhu d tfeḥcic, dɣa taɣuri igerzen akk d “wakal d wawal” n urezqi Djamal.

 BaluliFerhat

http://www.depechedekabylie.com/ddk-tamazight/93273-gar-tmacahut-d-tullist.html